Sjálfstjórnarsvæði

Sjálfstjórnarsvæði eða sjálfstjórnarhérað er stjórnsýslueining eða yfirráðasvæði fullvalda ríkis sem býr við sjálfsforræði eða heimastjórn í tilteknum málum, undir ríkisstjórn landsins sem veitir heimastjórninni tiltekin völd með valddreifingu. Tilgangurinn getur verið að auka lýðræðislega þátttöku, bæta stjórnsýslu, eða draga úr hættu á átökum. Ólíkt fylkjum sambandsríkja fer sjálfsforræði sjálfstjórnarsvæða eftir aðstæðum á hverjum stað fyrir sig og byggist á sérstökum lögum eða tilskipunum. Sjálfstjórnarsvæði er oftast landfræðilega eða menningarlega aðgreint frá öðrum landsvæðum ríkisins og hefur þannig sérstöðu.

Dæmi um sjálfstjórnarsvæði eru Norður-Írland (Bretlandi), Færeyjar (Danmörku), Hong Kong (Alþýðulýðveldinu Kína) og Sansibar (Tansaníu).