Óskar 2. Svíakonungur

	Svíakonungur
	Bernadotte-ætt
	Óskar 2.
Ríkisár	18. september 1872 – 8. desember 1907 (í Svíþjóð); 18. september 1872 – 7. júní 1905 (í Noregi)
Skírnarnafn	Oscar Fredrik
Kjörorð	Brödrafolkens väl (til 1905); Sveriges väl (frá 1905)
Fæddur	21. janúar 1829
	Drottningarhólmahöll, Stokkhólmi, Svíþjóð
Dáinn	8. desember 1907 (78 ára)
	Stokkhólmi, Svíþjóð
Gröf	Riddarahólmskirkjunni
Undirskrift
	Konungsfjölskyldan
Faðir	Óskar 1.
Móðir	Jósefína af Leuchtenberg
Eiginkona	Soffía af Nassau
Börn	Gústaf 5.; Oscar Bernadotte; Karl prins; Eugen prins

Óskar 2. (Oscar Fredric, 21. janúar 1829 – 8. desember 1907) var konungur Svíþjóðar frá 1872 til dauðadags, konungur Noregs frá 1872 til 1905 og hertogi af Austur-Gautlandi.

Óskar var þriðji sonur Óskars 1. Svíakonungs og konu hans Jósefínu af Leuchtenberg. Hann var því ekki alinn upp til ríkiserfða, heldur gekk hann í sjóherinn og varð sjóliðsforingi og skrifaði bækur um sjóhernað, auk þess sem hann samdi ljóð og gaf út ljóðabók og fleiri rit. Hann stundaði einnig nám í stærðfræði við Uppsalaháskóla og var heiðursfélagi í sænsku vísindaakademíunni.

Þegar Óskar 1. dó 8. júlí 1859 og Karl 15., elsti sonur hans, tók við varð Óskar ríkisarfi því bróðir hans átti ekki son á lífi. Hann átti að vísu eina dóttur, Lovísu, en konur áttu ekki erfðarétt í Svíþjóð samkvæmt stjórnarskránni frá 1809. Næstelsti bróðir þeirra, Gústaf prins, hafði dáið barnlaus. Óskar átti sjálfur son og ríkiserfðirnar voru þvi tryggðar, svo að ekkert varð úr hugmyndum um að breyta stjórnarskránni og gera Lovísu arfgenga.

Óskar 2. tók því við ríkjum þegar bróðir hans lést 18. september 1872. Hann hafði mikinn áhuga á utanríkismálum og var mikill aðdáandi Otto von Bismarck Þýskalandskanslara. Hann reyndi að koma á bandalagi Skandinavíu, Þýskalands og Ítalíu og hugsanlega einnig Bretlands. Stærsti ósigur hans var sambandsslitin við Noreg 1905 en hann reyndi mikið til að viðhalda konungssambandinu, heimsótti Noreg árlega eða oft á ári og talaði norsku reiprennandi.

Fjölskylda

Óskar giftist Soffíu af Nassau 6. júní 1857. Synir þeirra voru:

Gústaf 5. (1858-1950), konungur Svíþjóðar.
Oscar Bernadotte (1859-1953), sem þurfti að afsala sér konunglegum titlum og erfðatilkalli vegna hjónabands síns. Hann var faðir sænska diplómatans Folke Bernadotte.
Karl prins (1861-1951), hertogi af Vestur-Gautlandi.
Eugen prins (1865-1947), hertogi af Närke.

Heimildir

Fyrirmynd greinarinnar var „Oscar II“ á sænsku útgáfu Wikipedia. Sótt 28. febrúar 2012.

Fyrirrennari:
Karl 15.

Svíakonungur
(1872 – 1907)

Eftirmaður:
Gústaf 5.